خانه گنجینه اشعار محرم الحرام

زینتِ کلکِ هنر خالق منّان آدیدی

  • بروزرسانی: شنبه 25 مرداد 1399
  • شناسه: 1999
  • بازدید: 11
  • شاعر: محمدعلی مصیبی تبریزی
  • چاپ:

زینتِ کلکِ هنر خالق منّان آدیدی

زینتِ کلکِ هنر خالق منّان آدیدی

«کرامت حسینی»

«شرح ملاقات جوان بیماردرواپسین لحظات عمر باآقا ابی عبدالله»

زینتِ کلکِ هنر خالق منّان آدیدی
قلب عشاقه شرر قادر سبحان آدیدی
رمز و مصداق ظفر صاحب کیهان آدیدی
اذن وئردی آدینی اوّل دفترده یازام
مرحمت ایلیه جاق مطلبی بی پرده یازام


ایستیرم فلسفۀ عشق و صفادن دانیشام
بیر طبیب آدی دیئم باب شِفادن دانیشام
ابتلا دردین آچام صوندا دوادن دانیشام
بیله سیزکیم شرف وعزّته نائل اولاجاق
ظلّ ممدود عنایت کیمه شامل اولاجاق


سِدر آغاجین دن اگر کِلک کتابت یولونا
چشمۀ کوثر همان کِلکه مرکّب اولونا
ماه وخورشیداونون لوح اولالارصاق صولونا
اوقلم ایسته سه بیرجمله یازا طُرفة العین
آند اولا قبلۀ توحیده ، یازار مظلوم حسین


ذکر منبرلر حسین جلوۀ محراب حسین
جوش ِمِجمرلرحسین شورِ میِ ناب حسین
عود و عنبرلرحسین شیعیه ارباب حسین
بو علی اوغلی دی آزاده لرین سروریدی
گلسه مین یوسف،اونون طلعتینه مشتریدی


جوششین زمزم آلار فاطمه نین اوغلوندان
درد اولان مرهم آلارفاطمه نین اوغلوندان
مین مسیحا دم آلار فاطمه نین اوغلوندان
دئنه عیسایه کی: ناز ایلمه،سن ئوزدمیوه
بو همان دی آناسی دم یتوروب مریمیوه


سوزیمی شاه غمین شأنینه تصنیف ائدرم
مستند بیر جریانی سیزه تعریف ائدرم
راوی مطلبیمی من بئله توصیف ائدرم
فاطمه دلبری نین مدح اوخویان نوکریدور
آدی محسن دی اونون شهرتیده عسکریدور


راوی بو جریان ساکن تبریزیدی
قلبی،مولاسی حسین عشقینه لبریزیدی
سند ذاکری ِ حق اونا تنفیذیدی
شهر تهرانه هر از گاه گئدردی گویا
آذری لر هَیَآتینده ائدردی غوغا


بئله نقل ایلوری راوی که همان تهراندا
بیر رفیقیم واریدی دکتریدی عنواندا
اعتقادی آزیدی فلسفۀ ایماندا
منه ایراد ائلیَردی بو خرافات نه دور؟
کربلا دردی نه دورقبلۀ حاجات نه دور؟


بونه سودادی سیزون عقلیزی اللردن آلوب
گوزلریزآغلاراولوب قلبیزی بس درده سالوب
فکروذکریزبیرحسین بیرده چوخوریرده قالوب
فکرائدورسیزکی آقازعشقیزه عنوان وئره جاق
یاگلوب قلبیده کی دردیزه درمان وئره جاق


چوخ ادلّه گتوروب سایدیم اونی قانع ائدم
لاف و بیهوده دانیشماقلارینا مانع ائدم
اهل بیتین هدفین مرتبط صانع ائدم
گوردیم اما نه قدرکوشش ائدم یوخدی ثمر
قلبی ازبس کدر و تیره دی سوز ائتموراثر


نوکر درگه عشق اولماقا شکر ایلیردیم
دکترین سوزلرینه دایمی فکر ایلیردیم
بیرگون عشقیله حسین آدینی ذکر ایلیردیم
مجلسین حالی واریدی اثر ائتمیشدی سوزوم
بیر زمان دوشدی همان دکتره مجلسده گوزوم


سوز ِآهیله یانان سینه سینی داغلوردی
یوزینه گوزدن آخان قان یاشینی باغلوردی
گه سزیلدیردی گهی باشه ووروب آغلوردی؛
یاحسین عفو ائله گلدیم قاپیوا دالدالانام
کیم سنون آدیوی سسلور باشینا من دولانام


دئدیم؛ الله نه گلوبدی بو طبیبین باشینا
آقامی سبّ ائلین ایندی ورور ئوز باشینا
باخ گوزوندن یوزونه سیل اولونان گوزیاشینا
بولمورم نقشه دی ایستیربوعزا خواراولسون
یاگلوب فلسفۀ عشقه گرفتاراولسون


قورتولوب بزم عزا گلدیم اونون محضرینه
گوزومی تیکدیم اودم گوزده کی اشک ترینه
بیر سلام ائتدیم حسینون او تازا نوکرینه
دئدیم آغلار گوزوین یاشی ورور قلبه یارا
دی گوروم سن هارا دکتر بوعزاخانه هارا


دئدی چوخ قلبیمه وورما یارا قلبیم یارادی
ایندی بولدیم کی حقیقتیولی هاردان هارادی
قولاق آس باشیمین احوالینه بیر ماجرادی
راه حقدن نئچه ایللردی گریزانیدیم
دکتریدیم ولی من جزو مریضانیدیم!


بیر مریضیم واریدی قامتی بس زار ونحیف
بیرجوانیدی،که امراض اونی ائتمیشدی ضعیف
لاعلاجیدی ئولوم پیکینه اولمازدی حریف
کس وکاری یوخودی نه آتا نه قارداش اونا
گئت به گئت پیک اجل سایه سالوردی باشینا


چون کس وکاری یوخیدی من اونایاراولدوم
ئورگیم یاندی اونون حالینه غمخواراولدوم
قولاق آسدیم سوزینه محرم اسرار اولدوم
گوزلری صاف و زلالیدی مثال شیشه
باخیشی مُنتظرانِیدی اونون همّیشه


انتظار اهلینین همیشه گوزی یولدا قالار
باخیشیلن شرر آهینی آفاقه سالار
عاقبت مطلبینی درگه باری دن آلار
فرقتی چاتسا باشا! عزت و شانی اوجالار
دردینه اولماسا چاره،جوان اولسا قوجالار


گونلرین بیرگونی من طبق روال وعادت
رَتق وفتق ائتدیم اموراتیمی تاپدیم فرصت
حال واحوالینی گلدیم سوروشام بی منّت
وارد اولجاق اتاقا یاریمی خندان گوردوم
او کی مغمومیدی همّیشه غزلخوان گوردوم


یوزدوتوب سویله دی دکترسنه بیرعرضیم وار
دار دنیاده فقط سن سن اولوبسان منه یار
دئدیم امر ایله دئنن حاجتیوی اولما فکار
سویله دی گر،سنه مقدوریدی منّت قویاسان
منه بیر تازه لباسیله بیرآز عطر آلاسان


دئدیم اولما نگران ایستدیقون حاضراولار
تاپارام اگنیوه بیر البسه کی فاخراولار
سنه بیرعطر آلارام مِشکیله والله بیراولار
ولی سویله نئدوسن البس ومشک خُتنی
اگر امکانی وار آگاه ائله بو سرّه منی


دئدی دکتر بوسوزوم عقلیوه هذیان گله جاق
ولی بیر وقت مقرر منه مهمان گله جاق
او ایاق قویسا بورا دردیمه درمان گله جاق
مرغ روحیم اونی گورجاق پر آچار پروازه
پرده لر ردّ اولونوب پی آپارارسان رازه


دئدیم الله ئورگین ، غصّه خدنگی سوکه جاق
کس وکاری یوخودی کیمسه بونا باش چکه جاق
کیم بو سودازَدیه اشک مصیبت توکه جاق
ئوزئوزومله دیورم حیف بو گول تئزسولوری
ئولوم آثاری گلوبدی بئله هذیان یولوری


استجابت ائله دیم خواهشنی من فوراً
هم لباس ایله دیم آماده هم عطر آلدیم من
تاگوروب ایستدیقین توکدی یوزه اشک مُحن
دئدی الله سنی ماجور ائله سین ، ارزنده
قویمادین من قوناقیم گلجاق اولام شرمنده


دئدیم آخرقوناقین کیمدی سنی درده سالوب
صبریوی طاقت و آرامشیوی الدن آلوب
دئدی بیرکسدی باشیندان بدنی آیری قالوب
ایستیسن سرّیمه آگاه اولوب دینجلسن
بوگئجه ساعت اون ایکی بورا گلسن گوره سن


وعده سین ائتدیم اجابت دئدیم الوعده وفا
گلرم عرض ارادت ائلیم اول قوناقا
گجه اون بیریاریمی دی گینه گلدیم اتاقا
اونی مشغول مناجات وعبادت گوردوم
گتدیقیم البسه نی اگنینه زینت گوردوم


باشی نین اوسته گلوب سسلدیم آدین سانون
دئدوم آهسته اوغول هاردا قالوب مهمانون
گله تا دست شفا بخشی وئره درمانون
ساعتی آلدی خبر من دئدیم اون بیریاریمی
عرض ائدوب وقت مقرر گوره سن دلبریمی


ذکره مشغولیدی سویلوردی ئورک مرهمیدی
گوزلری شوق ملاقاتیله گوردوم نمیدی
عقربه عقربه اوستونده دایانمیش دمیدی
ناگهان مست ائلیوب گویلومی بیرعطرنکو
بیر گوزل رایحه ایلوبدی اتاقی خوشبو


آنداولا آیت قرآنه کی مسطور گلوب
آنداولا سجده ده کی ذکره کی دستورگلوب
بیرزمان گوردوم همان محفیله بیرنورگلوب
گوئیا گون چیخوب آفاقی دوتوب نورجلی
او محقر اتاقا گلدی علی نین گوزلی


نشئۀ جنت الاعلی دی دولوبدی اتاقا
اوجوانین گوزی تادوشدی صفالی قوناقا
الی نی تکیه ائدوب دوردی یریندن ایاقا
دردی یاددان چخادوب تا گوروب اول شهیاری
دیه سن یوخدی وجودینده مرض آثاری


تترین لبلریلن سویله دی ای نور دوعین
السلام ای باشیمین تاجی امیر حرمین
السلام ای آدی هرقلبه صفا مظلوم حسین
خوش گلوبسن بوحقیرانه سرایه آقاجان
گویول آلچاق لیق ائدوبسن بوگدایه آقاجان


بیلوسن یوخدی منیم دارفناده قالانیم
بیرنفراولمادی من سایه سینه دالدالانیم
اذن وئرسن آقا قانلی باشیوا بیر دولانیم
وصلیوه چاتدیم آقا ایسته خدادن امداد
جانیمی تئزآلا،غمدن دولی قلبیم اولا شاد

 

بیرزمان من ئوزومه گلدیم او وانفسادن
تختین اوستونده جوان گئتمیشیدی دنیادن
دئدیم الله بو جقیقت دی و یا رویادن؟
نه او نور اوردا واریدی نه او عطرملکوت
دوتموشیدی اتاقین هرطرفین پیک سکوت


بولدیم آخر اوجوانین غمی روحی غمی دی
قامتی درد فراقه بوکولوبدی خمیدی
کربلا سرورینی گورماق اونا مرهمیدی
ایندی بولدوم ئورگین غمده رهآوردی نه دور
ایندی بولدوم کی بوتون شیعه لرین دردی نه دور


بولموشم کیم گئده عزت یولی نامرد اولماز
آتش عشق ولایت ابدا سرد اولماز
کربلا دردی کیمی شیعه لره درد اولماز
او قدَر آغلارام عشق آتشینه قلب آلیشا
گوزیمین یاشی گلوب دلده کی قانه قاریشا


ای«مصیّب»گوزون آغلار قالا!عزت تاپاسان
وور قلم راه ولایتده کی نصرت تاپاسان
مطمئن اوُل عرصات ایچره شفاعت تاپاسان
او قدر آغلاگیلن قان وئره عشقین یاراسی
جان وئرن دم سنه ده باش چکه زهرا بالاسی
ـ


 شرح شاعر بر این شعر : جریان این کرامت حسینی اززبان حاج محسن عسکری مداح باصفای اهل بیت به کرار نقل شده است پس ازآنکه آنرا به نظم درآوردم یک نسخه اش را هم محضر حاج محسن درشهرتهران ارسال نمودم که از طریق تلفن بنده را مورد لطف ومحبت خود قرار دادند همچنین این جریان را که بارهاازمجالس اساتید بزرگواری همچون حاج رحیم جباری ،حاج احمد برازنده و سایر مداحان عزیز بیان شده  والبته بانقل قول اولیه ازشادروان حاج  حسن ناجیان هست تقدیم همه عاشقان دربار ابی عبدلله می نمایم امیدکه مورد تایید واقع گردد.