close
دانلود آهنگ جدید
ساداته سرورم من، احراره رهبرم من
خانه گنجینه اشعار امام کاظم (علیه السلام)

ساداته سرورم من، احراره رهبرم من

  • انتشار: چهارشنبه 28 اسفند 1398
  • شناسه: 1228
  • بازدید: 25
  • شاعر: علیرضا حضرتی
  • چاپ:

ساداته سرورم من، احراره رهبرم من

ساداته سرورم من، احراره رهبرم من

در مدح حضرت امام کاظم علیه السلام

ساداته سرورم من، احراره رهبرم من
سرمست جرعه نوش صهبای کوثرم من
بند دل بتولم، زهرایه دلبرم من
ماه مدار عزّت، سبط پیمبرم من
محبوب داورم من، موسی بن جعفرم من

 

شأن و شرافتیم وار جاه و جلالتیم وار
هارون شوم کیمدی؟ امر امامتیم وار
بو کنج محبسیمدن دهره ولایتیم وار
ذرّات کائناته لطف و عنایتیم وار
محبوب داورم من موسی بن جعفرم من

 

من وئرمسم اجازه آچماز قاناد ملکلر
هر لحظه محضریمده پابوسدور فلکلر
عرض ارادت ایلر درگاهیمه سمکلر
مُلک حکومتیمدی عشق عالمی اورکلر
وارسته گوهرم من موسی بن جعفرم من

 

یئر گوی قالار یئریشدن ائتسم اگر اشاره
سیّاره میخکوب و سیّار اولار ستاره
گون آسماندا محو و آی گویده پاره پاره
یاغماز بولوت توکر اود صحرا و کوهساره
حقدن مخیّرم من موسی بن جعفرم من

 

بو مطلبه اورکدن واقفدی اهل ایمان
عصرین امامی ام من واردی الیمده امکان
گر ایستسم بو زندان فی الفور اولار گلستان
بوینومدا قانلی زنجیر قیرمیز چیچکلی ریحان
گلچینه بنزرم من موسی بن جعفرم من

 

هارون ظالم ایستور اگسون مسیر دینی
خوار ایلسون جهاندا اسلام و مسلمینی
بیلمور ولی او نادان بو نکتۀ یقینی
موسای عصر اولماز فرعونون همنشینی
قرآنه یاورم من موسی بن جعفرم من

 

ای عاشقان عالم من حجّت خدایم
دنیای پربلاده عشاقه پیشوایم
عالملرین امیری، مولای مقتدایم
دانشجوی کلاس ایثار کربلایم
درس آلموشام حسیندن ظلمه باش اگمرم من

 

جدّیم منیم حسیندی ابراز خفّت ائتمم
هیهات، من قبول ظلمیله ذلّت ائتمم
من نوره رهنمایم تبلیغ ظلمت ائتمم
محبسده ئوللم امّا هارونه بیعت ائتمم
خورشید انورم من موسی بن جعفرم من

 

بو خستۀ سلاسل ذات حقه ولی دی
نور ولایتیمدن افلاک منجلی دی
هارونه وئرمرم ال سیندیررام اول پلیدی
ظلمه باشیم اگیلمز جدّیم منیم علی دی
فرزند حیدرم من موسی بن جعفرم من

 

من پور مصطفایم غیرتده مرتضایم
صبر و شکیب و تاب و طاقتده مجتبایم
امّا شجاعتیمده چون شاه کربلایم
باش سجده ده چو سجّاد سرگرم ربّنایم
روح مطهّرم من موسی بن جعفرم من

 

من راضی ام رضای حق هر نه ائتسه تدبیر
قرآنه خاطر الله بو نوعی قیلدی تقدیر
کنده ایاقلاریمدا، بوینومدا واردی زنجیر
جاریدی لبلریمده هر لحظه ذکر تکبیر
عبد مظفّرم من موسی بن جعفرم من

 

شکر ایلرم اورکدن بو غملی سرنوشته
قسمت اولوبدی خلوت موسای حق سرشته
زندانی سجده لردن دؤندرموشم بهشته
دیداریمه منیم هی گویدن گلر فرشته
افلاکه محورم من موسی بن جعفرم من

 

محبسده اون بیر ایل دی ظلمیله قالموشام من
یوخ بیر دئین بو سنده، ظالم! قوجالموشام‌من
دین اوسته هر بلانی بو جانه آلموشام من
گون گؤرمورم قرانلوق یئرده سارالموشام من
مظلوم و مضطرم من موسی بن جعفرم من

 

ظلم و جفاسی سندین هر دم چکر زبانه
تکبیریمی دعامی الده ائدر بهانه
پی درپی اوندا گؤردون یاغدیردی تازیانه
یاننام پناه آپاررام خلاق لامکانه
بی یار و یاورم من موسی بن جعفرم من

 

بو کینه جودن اؤزگه یاده منی سالان یوخ
احوالیمه یانان یوخ بیر قیدیمه قالان یوخ
سندین الیندن الله بو بی کسی آلان یوخ
سلّولیمه گلنده دای غمچیدن امان یوخ
آهیله سسلرم من موسی بن جعفرم من

 

حامی اولان امام معصومه یوخدی الله
بیر ال‌دوتان بو زار و مظلومه یوخدی الله
غمخوار بو غریب و مغمومه یوخدی الله
جانیم یئتوب دوداقه معصومه یوخدی الله
بی‌یار و یاورم من موسی بن جعفرم من

 

الله نولاردی غملی قلبه صفا گلئیدی
جان لبلره یئتنده درده دوا گلئیدی
آغلار گؤزومه بیرده نور و ضیا گلئیدی
بالینیمه ئولنده اوغلوم رضا گلئیدی
دلداری گؤزلرم من موسی بن جعفرم من