close
دانلود آهنگ جدید
سلام اولا سیزه ای اهل دل! بو ناظمدن
خانه گنجینه اشعار امام کاظم (علیه السلام)

سلام اولا سیزه ای اهل دل! بو ناظمدن

  • بروزرسانی: چهارشنبه 28 اسفند 1398
  • شناسه: 1229
  • بازدید: 27
  • شاعر: سید بشیر حسینی میانجی
  • چاپ:

سلام اولا سیزه ای اهل دل! بو ناظمدن

سلام اولا سیزه ای اهل دل! بو ناظمدن

جریان معجزۀ حضرت امام کاظم علیه السلام به همراه گریز به مصائب کربلا

سلام اولا سیزه ای اهل دل! بو ناظمدن
کی ایستورم دانیشام من امام کاظمدن

 

آناسی کیمدی؟ حمیده، آتاسی کیم؟ جعفر
بویوک آناسیدی زهرا و جدّی پیغمبر

 

بو مطلبی اوخودم «تحفة المجالس»دن
نفیسدور ساییلور تحفه ی نفایسدن

 

بودور نظر کی چکم نظمه یاخشی جریاندی
بو نوعی نقل ائلیور راوی، آدی «ظبیان»دی

 

امامیله نبوی مسجدینده شوقیله
ناهار چاغی دانیشیردوق کمال ذوقیله

 

او دمده محضرینه شاملی بیر جوان گلدی
امامه تا ائلیه مطلبین بیان گلدی

 

ادبله اللری صدرینده بیر سلام ائله دی
حضور حضرته صدقیله احترام ائله دی

 

اؤزاق یولی بیلوسن عرض ائدوب نئجه گلدوم
امیدیله درِ باب الحوائجه گلدوم

 

واریمدی بیر یئکه مشکل الینده حیرانم
عنایتیله اؤنی حلّ ائله پریشانم

 

بویوردی ایله بیان ای جوان! ندور الان
خدا کرامت ائدر مُشکلون اولار آسان

 

دئدی کی شامیده محنتله زندگی ائدورم
وفالی شیعه ام آللهه بندگی ائدورم

 

واریدی بیر آتام ایستردی «آل سفیانی»
بویژه «معاویه»ئیله «یزید» و «مروانی»

 

بونا گؤره اؤنولا چوخ نزاع ائدردیم من
غضبلی حالیده اؤنلا وداع ائدردیم من

 

چوخیدی ثروت و سرمایه سی بو دنیاده
ئولوب گئدوب الی بوش، ایندی دار عقباده

 

من اوغلویام ولی مندن ائدوب مالین پنهان
هایاندا مخفی ائدوب بیلمورم، سنه قربان!

 

واریمدی ایندی نیازیم او ماله محتاجم
دولانمیشام باشیوا کعبه سن من الحاجم

 

لدنّی علمیله آگه ائله منی آقا!
کی هاردا گیزلَدوب اموالینی آتام آیا؟

 

«امام موسیِ کاظم» یازوبدی بیر نامه
وئروب جوانه بویوردی آپار بونی شامه

 

صورا بویوردی او حضرت کی ای اولان شامی!
بو نامه نی سن آپار چارشنبه آخشامی

 

او یئرده کی آتاوی دفن ائدوبسن اوردا دایان
ائلیکی اولدی گئجه یاری سسله: «یا درجان»!

 

او حینده گله جاق بیر نفر سلام ایله
بو نامه نی وئر اؤنا یاخشی احترام ایله

 

سنون آتاوی او حاضر ائدر همان یئرده
گئدر کناره گؤزوندن او دمده هر پرده

 

بیز اهل بیتی آتوندان سوروش گؤرن دمده
نه امر، ایله سه ایله عمل بو عالمده

 

خلاصه نامه الینده او شامه، یولاّندی
قولاق وئرون دالینا تا گؤراق نه جریاندی

 

گئدوب گئجه یاری قبرستانا او با ایمان
بدون واهمه بیردن چاغیردی یا «درجان»!

 

باخاندا بیر کیشی گؤردی دیور: منم «درجان»
قباقه گل دیء نه ایستورسن ای جوان! الآن

 

وئروبدی نامه نی اُول ناشناسه دقّتله
آلوب باخوب ئوپوب اُول دست خطّی حرمتله

 

دئدی جوانه دایان بوردا اولگیلان ناظر
گئدوم سنون آتاوی ایلیوم بو دم ظاهر

 

بیر آز سووشدی قییتدی یانیندا بیر حیوان
او حالتی گورن اولسا قالار عجب حیران

 

سالوبلا بویونونا زنجیر او قاره حیوانین
جوانین اُول جریان وحشته سالوب جانین

 

اشاره ایله دی «درجان» او حیوانا فی الحال
دئدی جوانه: آتوندور بو ای عجیب احوال!

 

تعجّبیله جوان سؤیله دی: معاذالله!
نیه بو شکله دوشوبدور آتام؟ او دم ناگاه

 

گلوبدی نطقه او حیوان به قدرت خالق
مخاطب ایله دی اوز اوغلونی کی ای عاشق!

 

بو شکله دوشماقیمین واردور علّتی اوغلوم!
اؤنا گؤره چکورم بو مذلّتی اوغلوم

 

جهاندا قلبیمی ائتدیم عداوتین کانی
همیشه مدح و ثنا ائتدیم «آل سفیان»ی

 

علیّ و آل علی له عداوت ائتدیم من
بنی امیّه چیلرله رفاقت ائتدیم من

 

بنی امیّه نین احوالینه سن آگاه اُول
یانیلّا آتش دوزخده گونده یئتمیش یول

 

بودور سفارشیم اوغلوم! آماندی دقّت ائله
پیمبر عترتینه خدمت و محبّت ائله

 

عذاب و درد و گرفتاری سُنّییه چوخدی
منه بو برزخ آرا بیر یئلیک دوران یوخدی

 

اولار کی آل رسولی سووُلّه دنیاده
او اهلبیتله محشور اولولاّ عقباده

 

علی یولوندا قدم وور بیر آیری یول گئتمه
مرام عترتی عمرون بویوندا ترک ائتمه

 

اشاره اهلی اولوب درک ائله اشاراتی
علی الینده دی عقبانین اختیاراتی

 

آماندی اؤزمه الون دامن امامتدن
اوزاقه گئتمه گیلن درگهِ ولایتدن

 

گئت ایندی اُول ائوه کی اگلشردیم اُول یئرده
شکاف، ایله کی صندوق واردی صول یئرده

 

منی دعا ائله حالیم اولوبدی برهم اوغول!
او یئرده وار ایکی یوز مین دمشقی درهم اوغول!

 

او پوللارین هاموسین ای بالا! بفوری گؤتور
ولیک الّی مینین محضر امامه یئتور

 

امام موسی ِکاظم امامِ برحقدی
عزیز فاطمه دی حقّی حقّ مطلقدی

 

جوان که آگه اولوب بو عجیب سوزلردن
آتاسیئیله او « درجان » یوخ اولدی گوزلردن

 

قییتدی گلدی جوان چاتدی اوز مرامینه
یتوردی مبلغ مذکوریده امامینه

 

یازیلدی معجزه سی چاتدی خاص و عام الینه
امام حقّی گرکدور چاتا امام الینه

 

قلم گریزه چکه مطلبی گوزل یئردی
اؤرک منیله بو منظورین اوسته ال وئردی

 

وروبلا سلسله روباهیلر ایکی شیره
ایکی امام الینی باغلیوبلا زنجیره

 

بیریسی موسی کاظمدی کُنج زنداندا
قان آغلار اهل ولا٬ گلسه آدی هر یاندا

 

دئمه او حضرته بیر آغلیان تاپولمادی
یولا باخان گوزینی باغلیان تاپولمادی

 

گلوبدی گوشه ی زندانه حضرت زهرا
دیوبدی بیله یانایانه حضرت زهرا

 

هَزاره تک چمنیندن اوزاق دوشن ای وای
بیر عمری اوز وطنیندن اوزاق دوشن ای وای

 

داریخما اللریمیله گوزیوی باغلیارام
بالالارون عوضیندن بو یئرده آغلیارام

 

گوزی گجه گونوزی یوللارا باخان بالا وای
بو سلسله یاراسیندان قانی آخان بالا وای

 

ستمله قوللاری باغلار قالان بالام لایلای
حیالی قیزلاری آغلار قالان بالام لایلای

 

ایکیمجی حضرته کی ویردیلار آغیر زنجیر
عزالی سیدسجادیدور اولوب دلگیر

 

جفالی سلسلیه باغلانوبدی قوللاری
او حالیله ائلیوب طیّ غملی یوللاری

 

جهازسیز دوه اوسته مریض و دلخسته
باخوردی نیزه باشینداکی باشه پیوسته

 

دیوردی ای باغینا صرصر خزان اسیلن
بلالی باشی قفادن جفائیلن کسیلن

 

او قانلی گوزلرون آچ باخ بو بی کس و یاره
کسوبدی بوینومی زنجیر ایلیوب یاره

 

دیار کوفه نی بیر نحویله سووشدوردوق
نقدری ویردیلا یاره دیله سووشدوردوق

 

بلالی شامیده دوندی منیم گونوم شامه
سپوبله اؤد باشیما اؤدلانوبدی عمامه

 

سالار جهانه شرر درد دللریم بابا
بو نیسکیل اولدی کی باغلیدی اللریم بابا

 

بو شهریده بیزه هئچ کیمسه احترام ائتمور
نه عمّه مه نه منه بیر نفر سلام ائتمور

 

چالولاّ ال بیزه باخدوقجا بی مروّتلر
گولولّه بیز اسرایه بو دین سیز عورتلر

 

«بشیر» یازدی بو شعری فقط بو منظوره
که بلکه ایلیه هدیه «علی #»ه